Në Ditën Ndërkombëtare të të Zhdukurve, kryeministri i Kosovës, Albin Kurti, u ka bërë thirrje të gjithë partnerëve ndërkombëtarë që të rrisin presionin e tyre ndaj Serbisë, për zbardhjen e fatit të të zhdukurve dhe vënien e përgjegjësve para drejtësisë.

Përmes një postimi në Facebook, Kurti, shkruan se varrezat e hapura në Kosovë ende po presin të vërtetën.

“Varret e hapura në Kosovë presin të vërtetën. Sot e gjithnjë u bëj thirrje partnerëve ndërkombëtarë që ta rrisin presionin mbi Serbinë, si përgjegjëse për zhdukjen e qytetarëve tonë, për të zbardhur fatin e tyre dhe për të vënë drejtësi duke dënuar përgjegjësit politikë ushtarakë e policorë për këto krime. Pesha e mungesës rëndon mbi familjet e 1617 personave të zhdukur me dhunë gjatë luftës në Kosovë”, shkruan Kurti.

I pari i qeverisë, shkruan se nënat presin ditën kur do të vendosin nga një lule në kujtim të më të dashurve të tyre, që u rrëmbyen e zhdukën me dhunë nga autoritetet e Serbisë, urdhërdhënëse dhe ekzekutore.

“Pas rënies së Millosheviqit, në Serbi u zbuluan pesë varreza të mëdha masive, me gjithsej 950 njerëz tonë të rrëmbyer e të vrarë, të vrarë e të rrëmbyer, në Batajnicë, Peruqac, Petrovo Selo, Rudnicë e Kizhevak. Serbia ende vazhdon të qëndrojë mbi varre masive teksa i mohon ato. Sot e gjithnjë u bëj thirrje partnerëve ndërkombëtarë që ta rrisin presionin mbi Serbinë, si përgjegjëse për zhdukjen e qytetarëve tonë, për të zbardhur fatin e tyre dhe për të vënë drejtësi duke dënuar përgjegjësit politikë ushtarakë e policorë për këto krime” shkruan ai./Arbresh.info/

Postimi i plotë: